Sialkoti Pigeons Archives - Kabootar Parwari

گلودو کبوتر سیالکوٹی کبوتروں کا جدامجد

admin — Thu, 18 Nov 2021 07:57:06 +0000

گلودو کبوتر سیالکوٹی – محترم قارئین یہ غالباً 90 کی دہائی کی بات ہے۔ جب اپنے بزرگوں سے چھپ کر ایک دوست اور ہم جماعت کے ساتھ مل کر کبوتر پروری کا شوق شروع کیا۔ وہ دو بھائی اور تیسرا میں، ہم تینوں پیسے ملاتے اور کبوتر خریدتے۔ اس زمانے میں ٹیکسالی کے داخلی راستے پر گھوڑوں کے پانی پینے کے لیے ایک خوض بنا ہوا تھا۔ اس کے ساتھ ہی سڑک پر ایک بڑا پنجرہ رکھے کسی شوقین نے دڑبی بنا رکھی تھی۔ میرے دوست کا اس پر بڑا اعتماد تھا کہ یہ بندہ اچھے کبوتر لاتا اور فروخت کرتا ہے۔

تحریر و ترتیب: استاد محمد حبیب مغل

گلودو کبوتر کی پہچان

ان دنوں ۳۰ روپے کا بہترین جوڑا لگا ہوا مل جاتا تھا۔ ایک دفعہ جب ہم اس سے کبوتر لینے گئے تو اس نے ہمیں ایک سرمئی عرےی سا چینا کبوتر دیا۔ دم اور باہر کے دس دس پر نیم سیاہ گردن پر دونوں جانب چھلے یعنی سفید پر۔ نوک، پلک، پنجے اور آنکھیں بھی عرےی گرے رنگ کی، اس کبوتر کا کھڑے ہونے کا انداز بے حد شاہانہ تھا۔ اس کبوتر کے ساتھ اس نے ہمیں اسی نسل کی پھیکی مادہ دی اور کہا کہ جاؤ بچو یاد ہی کرو گے جوڑا لگا ہوا ہے۔

ان دنوں ہم لگے جوڑے کو بڑی اہمیت دیتے تھے کہ اس جھنجھٹ سے بڑی جان جاتی تھی۔ گھر آکر کچھ دن بعد پتا چلا کہ دونوں نر ہیں۔ خیر ان دونوں کبوتروں کو باندھ کر چھوڑ دیا اور اپنے گھر میں موجود دو مادیوں سے لگا دئیے۔ جب وہ پکے جوڑے لگ گئے تو ہم نے ان کے پر کھول دیئے۔ کافی دن وہ دونوں ہماری چھت پر موجود سیمنٹ کی بنی ٹینکی پر بیٹھتے اور نیچے آجاتے۔

گلودو کبوتر کی پرواز کا انداز

ایک دن ان میں سے ایک کبوتر اڑا اور ہمارے منہ کھلے کے کھلے رہ گئے کیونکہ اس کبوتر کا اڑنے کا طریقہ انتہائی عجیب تھا۔ اس نے چھت پر دو سے تین چکر لگائے اور بعد میں قلابازیاں کھاتا ہوا ایک ہی جگہ آسمان میں بند ہو گیا۔ سارا دن انتظار کرتے رہے کہ اب آتا اب آتا ہے مگر کبوتر ۴ بجے تک بالکل نظر نہ آیا۔ اس وقت ہم کبوتروں کو دانہ ڈال کر بیٹھے تھے کہ بالکل اسی طرح قلابازیاں کھاتا نیچے آیا اور گھر پر ۴ سے ۵ چکر کاٹ کر بیٹھ گیا۔ ہماری خوشی کی انتہا نہ رہی۔

پھر ہمارا معمول بن گیا کہ ہم نے اپنے کبوتروں کے ساتھ ان دونوں کبوتروں کو اڑادینا۔ دونوں ایک ہی طرز میں اڑتے تھے۔ وہ جونسرے بچے بھی نکالتے تھے اور جیسے آج کے بٹیرے ہیں ایسے بچے بھی نکالتے تھے۔ ان میں سے کچھ بچے باپ کی طرز پر ہی اڑتے تھے۔ ایک دن سخت گرمی کا موسم تھا بڑا چینا کبوتر اوپر سے آیا قلابازیاں شروع کی تو اس کا شاید پر شل ہوگیا یا پٹھا چڑھ گیا۔ وہ کافی بلندی سے ہمارے گھر سے کچھ فاصلے پر ایک تالاب میں گر گیا۔ ہم نے بڑی دوڑ لگائی مگر اس کبوتر کو پہلے ہی اس تالاب میں موجود کتوں نے زخمی کردیا تھا۔ یہ ہمارا سب سے غمگین دن تھا چھوٹا کبوتر ہمارے پاس کافی دیر رہا مگر پرواز بڑے میں زیادہ تھی۔

علی والے اور چھت والے کبوتروں سے تعلق

یہ سارا واقعہ میں نے کینیڈا میں موجود اپنے دوست مرزا زوار صاحب کو سنایا اور کبوتر کا حلیہ بھی بتایا۔ انہوں نے کہا مغل صاحب وہ ایک نمبر گلودو کبوتر تھا۔ جس کا خون آج کے تقریباً تمام سیالکوٹی کبوتروں میں پایا جاتا ہے۔ بڑی تگ و دو کے بعد اس نسل کی کچھ تصاویر اکٹھی کی۔ نامور سینئر استاد بابا صدیقی کہتے تھے کہ یہ کبوتر علی والے اور چھت والے کبوتروں کے بلاواسطہ جد امجد ہیں اور بٹیرے اور 35 والوں کے بالواسطہ جد امجد ہیں سننے میں آیا ہے۔ بہرحال ایک بات بہت محسوس ہوتی ہے کہ ہم نے بھیڑچال میں بڑی بڑی اچھی نسلوں کو خود ختم کردیا۔

The post گلودو کبوتر سیالکوٹی کبوتروں کا جدامجد appeared first on Kabootar Parwari.

پینتیس والے کبوتر خوبصورت اور پائیدار سیالکوٹی بریڈ

admin — Thu, 22 Apr 2021 12:17:44 +0000

پینتیس والے کبوتر: پیارے دوستو! یہ بات تو تقریباً سبھی کو پتہ ہے کہ 35 والے کبوتر سیالکوٹ کے شوقین مراد سے سید یونس شاہ نے اس وقت 35 روپے کا خریدا. جبکہ ایک آفیسر کی ماہانہ تنخواہ 10 سے 15 روپے تھی۔

تحریر: استاد محمد حبیب مغل

کوئی کہتا ہے کہ مراد نے یہ جوڑا ایک راجہ سے اس کی خدمت کے عوض حاصل کیا. کوئی کہتا ہے کہ راجہ سے صرف نر لایا تھا مادہ جونسری لگائی تھی۔ ایک روایت یہ بھی ہے کہ وہ نر علی والا تھا اور مادہ جونسری لگانے سے 35 والے وجود میں آئے۔

خیر اس کی تاریخ بیان کرنا آج کی تحریر کا مقصد نہیں ہے. بلکہ اس خوبصورت اور پائیدار بریڈ سے متعلق اپنی زندگی کا تجربہ شیئر کرنا ہے۔

پینتس والے کبوتر اور میری زندگی کا تجربہ

آج سے تقریباً 25 سال پہلے کی بات ہے میرے نانا جی کے پاس بٹیرے، 35 والے، چوہے اور وحشی کبوتر مناسب تعداد میں موجود تھے۔ ابھی میرا شوق بہت ناپختہ تھا اور بزرگوں کی سخت مخالفت کیوجہ سے ڈربوں کی جانب جانے سے بھی ڈر لگتا تھا۔

نانا جی طبیعت کے بھی سخت تھے. آہستہ آہستہ میرا رجحان دیکھ کر کچھ وقت بعد انہوں نے مجھے اپنے ان کبوتروں میں سے 4 کبوتر دئیے. 1 وحشی نر، 35 والی مادہ، چوہا جونسرا جوڑا. مجھے تب بھی پتہ نہیں تھا کہ یہ 35 والی مادہ ہے۔ ہم اس کو ٹوپی والی مادہ کہا کرتے تھے۔

پینتس والے کبوتروں کی پہچان

جہاں تک اس کی جسمانی ساخت اور حُلیہ کا تعلق ہے. اس وقت وہ مادہ ایسی تھی کہ اس پر گوشت صرف اتنا تھا کہ وہ ہڈیوں کو ڈھانپ سکے۔ ہاتھ میں پکڑ کر دیکھو تو سکے کی طرح مضبوط. پلکیں سرمئی، آنکھ میلی یا کٹی پھٹی نہیں تھی۔

واضح روشن آنکھ، پیازی ذرات سے بھرپور، نیلی جالی نما. جب اڑ کر آتے تو آنکھ کے ذرات اور تیز رنگت میں آجاتے. نوک اور پنجوں کے ناخن کالے مائل بھورے، پنجوں کا رنگ جامن، دم میں ایک یا دو لنگوٹ یعنی کالے پر. ٹوپی گہری بھوری اور اتنی حساس اور چاق و چوبند کہ چھت پر ہلکی سی چیز کی حرکت پر خبردار ہوجاتی. ملائمیت ایسی کہ ہاتھ سے پھسلتی. ہم نے شروع میں اسے 3 پر چھوڑ کر کاٹ دیا تھا وہ انہی 3 پروں پر اڑ جاتی۔

کبوتر بازی میں ریکارڈ پروازیں

بے حد حساس اور چاق چوبند، چست مادہ تھی جب اسے پردار کیا تو لاجواب پروازیں دیں اپنے پروازی دورانیہ میں کئی دفعہ شام کو بیٹھی کئی ون ٹو ون مقابلوں میں نمایاں کارکردگی دکھائی۔

میں نے اسے اپنے دوست کے کہنے پر کاٹ کر بریڈنگ کے لیے رکھ لیا اور ایک ہرے کبوتر سے لگا دیا. پہلی جھول میں دونوں بچے چپڑے نکلے. ان بچوں نے بھی اپنی ماں کی طرح ایسی ناقابل فراموش پروازیں دیں کہ شاید تا زندگی یاد رہیں گی۔ یہ بچے سیان میں بھی انتہائی اعلیٰ درجے کے مالک تھے

پرانے پینتس والے کبوتر اور آج کے کبوتر

سیالکوٹ میں یہ معیاری کبوتر یوں تو کافی جگہوں پر موجود ہونگے. مگر میں نے استاد امتیاز ہیرا بیناں والے، شیخ احسان الٰہی، استاد گلزار، اور چند ایک دوسرے کھلاڑیوں کے پاس دیکھے ہیں۔

تحریر لکھنے کا مقصد یہ ہے کہ آج جس جسم اور آنکھ میں 35 والے یا بٹیرے کبوتر نظر آرہے ہیں اصل ان سے بہت دور تھے۔ میری تحریر کا مقصد کسی کی دل آزاری ہرگز نہیں. پھر اگر کسی کا دل دکھے تو پیشگی معذرت چاہوں گا۔

The post پینتیس والے کبوتر خوبصورت اور پائیدار سیالکوٹی بریڈ appeared first on Kabootar Parwari.